कोरबा।माननीय सुप्रीम कोर्ट के फैसला के बाद जोहार छत्तीसगढ़ पार्टी अउ छत्तीसगढ़िया क्रांति सेना के प्रमुख अगुवा अमित बघेल, डॉ. अजय यादव अउ दिनेश वर्मा ल जमानत मिलते जिला कोरबा म कार्यकर्ता मन म खुशी के माहौल देखे बर मिलिस।
एतिहासिक फैसला के स्वागत म जोहार छत्तीसगढ़ पार्टी अउ छत्तीसगढ़िया क्रांति सेना के पदाधिकारी अउ कार्यकर्ता मन फटाका फोड़के, मिठाई बांटके अउ एक-दूसर ल बधाई देवत अपन खुशी जाहिर करिन।
संगठन के पदाधिकारी मन कहिन कि ए फैसला न्याय अउ लोकतांत्रिक अधिकार के जीत आय। ए ले छत्तीसगढ़िया अस्मिता अउ स्वाभिमान के लड़ई ल नई ताकत मिलिस। संगठन के पदाधिकारी मन कहिन कि छत्तीसगढ़ महतारी, छत्तीसगढ़िया भाषा, संस्कृति, जल-जंगल-जमीन अउ प्रदेश के हक-अधिकार बर लोकतांत्रिक ढंग ले संघर्ष आगू घलो जारी रही।
संगवारी मन के कहना रहिस कि छत्तीसगढ़िया विचारधारा ल मजबूत करे बर जनजागरण अभियान ल अउ तेज करे जाही।
ए कार्यक्रम म प्रदेश संगठन मंत्री सुरेन्द्र राठौर,जिलाध्यक्ष जैनेन्द्र कुर्रे,जिला मंत्री लाला साहू,महिला जिलाध्यक्ष चंचल महंत,अनिशा महंत,छत्तीसगढ़िया क्रांति सेना के जिलाध्यक्ष सुरजीत सोनी महामंत्री राकेश सूर्यवंशी संगठन मंत्री ओम केंवट दीपका संयोजक अवध मरावी हरदीबाजार संयोजक लाला महंत सहित बड़ी संख्या म पदाधिकारी अउ कार्यकर्ता मन उपस्थित रहिन।